काठमाडौं- प्रतिनिधि सभाको उपसभामुख पदका लागि शुक्रबार मतदान हुँदैछ। उपसभामुख निर्वाचनका लागि दिउँसो ३ बजे प्रतिनिधि सभा बैठक बस्दैछ।
उपसभामुख पदका लागि सत्ता गठबन्धनबाट पुष्पा भुसाल र एमालेबाट विद्या भट्टराई प्रतिस्पर्धी छन्। भुसालले पहिलो नम्बरमा र भट्टराईले दोस्रो नम्बरमा उम्मेदवारी दर्ता गराएका छन्।
दर्ता क्रम अनुसार शुक्रबारको प्रतिनिधि सभा बैठकमा भुसाललाई उपसभामुख पदमा निर्वाचित गरियोस् भन्ने प्रस्ताव सुरुमा प्रस्तुत हुनेछ। सो प्रस्ताव देवप्रसाद गुरुङले प्रस्तुत गर्नेछन्। त्यस्तै, लक्ष्मीकुमारी चौधरीले समर्थन गर्नेछिन्।
त्यसपछि दोस्रो दर्ता क्रममा रहेकी भट्टराईलाई उपसभामुख पदमा निर्वाचित गरियोस् भन्ने प्रस्ताव प्रस्तुत हुनेछ। सो प्रस्ताव शान्ता चौधरीले प्रस्तुत गर्नेछिन्। र, कृष्णभक्त पोखरेलले समर्थन गर्नेछन्।
प्रतिनिधि सभा नियमावलीअनुसार, दुवै प्रस्तावमाथि संक्षिप्त छलफल हुनेछ। र, सभामुखले प्रस्तावलाई निर्णयार्थ प्रस्तुत गर्नेछन्। मत निश्चित गर्नका लागि दस्तखतसहितको मत विभाजन प्रक्रिया (मतदान) अपनाइनेछ।
भुसालको उम्मेदवारी पहिलो नम्बरमा भएकाले सुरुमा उनलाई नै निर्वाचित गरियोस् भन्ने प्रस्तावमाथि मतदान हुनेछ। सत्ता गठबन्धनको बहुमत भएकाले उनी नै निर्वाचित हुने सम्भावना छ।
प्रतिनिधि सभा नियमावलीमा 'जुन प्रस्ताव प्रतिनिधि सभामा तत्काल कायम रहेका सम्पूर्ण सदस्य संख्याको बहुमतबाट पारित हुन्छ सो प्रस्तावमा प्रस्तावित सदस्य उपसभामुख पदमा निर्वाचित भएको मानिनेछ र बाँकी प्रस्तावलाई निर्णयार्थ प्रस्तुत गरिने छैन' भन्ने उल्लेख छ।
त्यसैले भुसालले बहुमत पाएमा भट्टराईमाथि मतदान हुनेछैन।
२०७४ सालमा उपसभामुख पदका लागि निर्वाचन हुँदा पनि भुसालको उम्मेदवारी दर्ता पहिलो नै थियो। भुसालको प्रस्तावकमा डिला संग्रौला पन्त र समर्थक देवेन्द्र राज कँडेल थिए। चैत २ गते भएको निर्वाचनमा भुसालको पक्षमा ६१ मात्रै मत परेको थियो। उनको विपक्षमा २ सय १ मत परेको थियो। मतदानमा २ सय ६२ सहभागी भएका थिए।
त्यस्तै, वामगठबन्धनकी उम्मेदवार शिवामाया तुम्बाहाङ्फेको उम्मेदवारी दर्ता दोस्रोमा थियो। उनका प्रस्तावक देवप्रसाद गुरुङ र समर्थक रवीन्द्र अधिकारी थिए।
भुसाललाई निर्वाचित गरियोस् भन्ने पहिलो प्रस्तावमा बहुमत नआएपछि तुम्बाहाङ्फेलाई निर्वाचित गरियोस् भन्ने दोस्रो प्रस्तावमाथि मतदान भएको थियो। उनको पक्षमा २ सय १ मत परेको थियो। विपक्षमा भने ५८ मत परेको थियो। मतदानमा २ सय ५९ सहभागी भएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789992067.jpeg)
-1786602170.png)
-1789631269.jpg)
